TACLOBAN CITY — Dead on the spot an usa nga construction worker mahuman nga pagpamusilon han waray pa makilal-e nga mga suspek ha Barangay Paco, Paranas Samar.
Ginkilala an biktima nga hi Ernesto Quebec Mabilangan, alyas “Puday”, 50 anyos an pangidaron, ngan residente han Barangay Concepcion, Paranas, Samar.
Sumala kan PO3 Crisencio Riyandino Jr., han Paranas PNP, nga subay ha ira inisyal nga imbestigasyon nga samtang nagtratrabaho ha usa nga road project an biktima in tigda nala ini nga ginpanmumusilon han mga suspek ngan ugsa nga kumalagiw in nagyakan anay nga “Ayaw kahadlok kay NPA kami, patay ka gihap Puday”.
Nag-angkon hin igo ha magkadurudilain nga parte han iya lawas an biktima nga nagin kausa han iya dayon nga kamatayon.
Subay naman ha impormasyon tikang ha mga witness nga may mga record na daw hin pangawat an mao nga biktima ngan dati nga intel han mga kasundaluhan.
Ha pakighimangraw han Bombo Radyo Tacloban ha kasundaluhan, gindiwara naman han 87th Infantry Battallion Philippine Army an alegasyon nga dati nira nga intelligence an ginpusil patay nga biktima.
Sumala kan Lt. Julius Tecson, civil military operations officer han 87th IB, nga waray kamatooran an ginpagawas nga impormasyon han Arnulfo Ortiz Command (New People’s Army-Western Samar).
Dugang pa hini nga panuyo la han NPA gubaon an imahe han mga kasundaluhan ha mga katawhan.
An pamahayag ni Lt. Julius Tecson, civil military operations officer han 87th IB
Pagklaro pa han mao nga opisyal nga an mao nga biktima in dati nga ginsusugo han mga NPA pagdara hin pagkaon ngadto ha bukid, diin ha paghagos han panahon in bumulag na ini ha grupo han NPA nga nagin rason ha pagpataya hini.
