TACLOBAN CITY – Patay an usa nga gintutuohan nga mayda spacial mental illness mahuman ine nga masunog ha sulod han ira panimalay ha Sitio Patong Brgy. Consuegra Leyte-Leyte.
Ginkilala an biktima kan Maribeth Olidan, 47-anyos an pangidaron, single, waray trabaho, ngan residente han nasabi nga barangay.
Sumala kan PLT. Rusthy Alvarado, Officer Incharge han Leyte-Leyte Municipal Police Station, nga naka-karawat hira hin tawag mga pasado alas-dos han kakurulpon tikang ha barangay kapitan han nasabi nga barangay, kun diin nag-report ine nga mayda panimalay nga nasusunog ha iya nasasakupan.
Dayon naman nga rumesponde an mga otoridad, ngan nagbaktas an mga ine hin haros 2 ka oras ugsa nga madangat ha mao nga barangay.
Ha ira pag-abot, ugbaw na nga panimalay an ira naabtan, samtang an patay nga lawas han biktima in nakadto la gihapon ha sulod han iya panimalay.
Subay ha ira inisyal imbestigasyon nga himo ha mga light materials an panimalay sanglit nga dayon ine nga naugbaw han kalayo.
Dugang pa han nasabi nga opisyal, naka-kuha hira hin pira nga mga imporamsyon ha mga kaamyaw han biktima kun diin nababatian han mga ine nga nagyakan hi Maribeth nga magsusunog nala ine ha iya balay.
Mababaruan, nga ginprobaran pa han iya mga kaamyaw nga salbaron an biktima han magtikang an sunog, pero pakyas an mga ine matungod nga naka-kandado an purtahan gamit an usa nga kadena.
Ginbabana-bana naman nga maabot ha P20.000 an ginbayaan nga danyos han mao nga sunog.
