TACLOBAN CITY – Ginpahayag han Professional Regulation Commission (PRC) Regional Office 8 nga waray pagbabag-o nga ira ginpapatuman ha mga aludayday ha examinations ngan oath taking han mga exam passers ha rehiyon ha kaluyo nga ginpailarom na han IATF ha alert level 1 status an Tacloban.
Sumala kan Armond Englis, Regional Director han PRC Regional Office 8, parehos la gihapon nga mga requirements an ira gin-aaro ha mga examinees sugad han pagpresentar han ira mga vaccination cards.
Kun dire pa bakunado an usa nga examinee, in kinahanglan nga magpresentar hin negative RT PCR test o antigen test sugadman quarantine certificate.
Padayon gihapon an mahugot nga pagpatuman han health protocols kontra COVID-19 ha examination venue partikular na an pagmentinar han physical distancing, pagsul-ot hin face mask ngan iba pa.
Samtang, nagpapabilin naman nga online an oath taking han mga exam passers sanglit waray magiging kagarastusan han mga ini tungod nga pwede nga ada la hira ha ira mga panimalay.
