Ini in kasumpay han increasing trend han COVID-19 cases ha Sinirangan Bisayas ha naglabay nga mga adlaw. Sumala kan Jelyn Lopez, Information officer han DOH 8, ginlalauman nga mas mahitaas pa an kaso han mao nga sakit ha bug-os nga rehiyon tungod han active contact tracing han mga nagpositibo nga pasyente.
Hapagkayana in maabot gihapon ha 94 nga mga barangay ha Eastern Visayas an nakaghipatik hin clustering of cases o an mga barangay nga mayda sobra ha upat nga mga kaso nga naitala han naglabay nga duha kasemana.
Nahibaruan nga hapagkayana in mayada na 22, 291 total COVID-19 cases an Eastern Visayas kun diin 20, 425 ha mga ini an nakarekober na, 325 an nahipatik nga namatay ngan 1, 541 naman an padayon nga nagpapaupay o an mga active cases.
Padayon naman an panawagan ngan pahimatngon han DOH ha publiko nga dire magtagya ngan padayon nga magsunod ha mga health protocols kontra ha mao nga virus.
