TACLOBAN CITY – Nagtutuo an daw genuine party han PDP-Laban nga gintatagmanguluhan ni Senator Koko Pimentel nga taktika la ni Presidente Rodrigo Duterte para makabalik ha Malakanyang ha tidaraon nga eleksyon an ginbuhat nga daw “hijacking” han grupo ni Energy Secretary Alfonso Cusi.
Sumala ha Vice Chairman han PDP Laban nga hi Atty. Lutgardo Barbo, ha pakipaghimangraw han Bombo Radyo Tacloban, an naging nominasyon han grupo ni Cusi kan Presidente Duterte nga dumalagan kumo bise presidente ha 2022 elections ngan hi Sen. Bong Go naman para pagkapresidente in taktika la han mao nga grupo agud nga magpabilin hi Duterte ha Malakanyang.
Dugang pa hini nga nakikita nira nga plano han grupo ni Cusi nga kun pananglitan nga magdaog ha eleksyon an Go-Duterte tandem, in posible nga papagbul-iwon ha pwesto hi Bong Go para hi Duterte na utro an maging pangulo pinaagi han rule of succession.
Nagtutuo gihapon an grupo ni Sen. Pimentel ngan ni Atty. Barbo nga baga baga la hin “caregiver” ni Presidente Duterte hi Senator Bong Go.
Gindig-unan gihapon ni Atty. Barbo nga sayop an ginbubuhat han grupo ni Cusi tungod nga dire an mga ini otorisado nga opisyal han ira partido nga PDP-Laban.
