Nanawagan hi Senator Sherwin Gatchalian hin mas agresibo nga pitad han gobyerno agud batunon an nagtitikaduro nga krisis ha enerhiya nga durot han paghitaas han presyo han lana ha world market.
Partikular nga gin aghat han senador an ehekutibo nga maig-istorya ha Iran agud masigurado nga talwas an pag-aagian han mga oil vessel han Pilipinas ha Strait of Hormuz, usa nga kritikal nga ruta han suplay han lana.
Sumala kan Gatchalian, importante an kadagmitan nga high-level diplomatic actions agud malikayan an pagdelatar han supay nga mas nagpapabug-at la ha mga konsumidor.
Kadungan hini, ginmalatumat gihapon han senador nga naghahatag hin paglaum an Camago-3 gas field ha butnga han naghihinitaas nga energy costs, sugadman in aabuton pa ini hin panahon ugsa maabat ha presyo han kuryente.
Gintagan-duon ni Gatchalian an importansya han padayon nga eksplorasyon ngan pamumuhunan ha lokal nga enerhiya agud masigurado an supreyente nga suplay ngan mas abot-kaya nga presyo.
Samtang, kasunod han nakabantay nga paghitaas han presyo han LPG, gin aghat gihapon ni Gatchalian an Department of Energy ngan Department of Trade and Industry nga pag-adman an pagpapatuman han price cap.
Sumala ha senador, pwede igpatuman an price ceiling ha ilarom han Republic Act No. 10623 nga nag-amyenda ha Republic Act No. 7581 agud maproteheran an mga konsumidor kontra ha dire resonable nga paghitaas han presyo,
Duon pa hini, importante nga panginahanglan an LPG ha mga kabalayan ngan gudti nga negosyo sanglit anuman nga tigdaay nga paghitaas hini in direkta nga makakaapekto ha pakabuhi ngan presyo han pagkaon.
Ha katapusan, iginduon han senador nga kinahanglan hin dudrungan nga pitad, tikang ha diplomasya, lokal nga produksyon, kutob ha regulasyon han presyo, agud masigurado an supresyente nga suplay ngan mapagaan an epekto han krisis ha enerhiya ha mga Pilipino.
