TACLOBAN CITY — Ginpahayag ni Anthony James Albis, Economics Assistant Professor han University of the Philippines Tacloban College, nga temporaryo la nga solusyon an fuel subsidy nga ginhahpatag ha transport sector, ngan diri ini sakto agud maresolba an krisis ha petrolyo.
Sumala ha iya, ha kaluyo nga nakakabulig an subsidiya kumo proteksyon han kuhida han mga drayber labi na ha butnga han ginpapatuman nga four-day work arrangement, diri la gihapon ini maikokonsiderar nga pang-maihaan nga solusyon ha padayon nga pagsaka han presyo han lana.
Gin-esplikar pa hine, nga ha konsepto han supply ngan demand, kun naiibanan an adlaw han biyahe ngan trabaho, naiibanan gihapon an kuhida han mga drayber.
Sanglit, nagigin importante an subsidiya kumo temporaryo nga bulig agud mapun-an an nawara nga kuhida.
Ha lain nga bahin, ginduon ni Albis nga kinahanglan sektoral an pitad han gobyerno ha pag-atubang han krisis.
Kinahanglan tutokan an mga sektor nga pinaka-apektado sugad han transportasyon ngan agrikultura agud mas epektibo an mga igintatagad nga solusyon.
Nagpahimatngon gihapon an eksperto ha posible nga domino effect han pagsaka han presyo han lana, nga direkta nga nakaapekto ha presyo han mga pangunahon nga panginahanglan, labi na ha mga produktong agrikultural.
Dugang pa, an paghinay han balor han piso kontra dolyar in nagpapaubos han purchasing power han mga Pilipino, rason nga gutiay nala iton kaya paliton han mga ine.
Tungod hini, ginpunto han eksperto nga an fuel subsidy in usa la nga klase hin bulig ha panahon han krisis, pero diri ini an permanente nga solusyon ha bug-os nga problema ha ekonomiya.
