MATAG-OB, LEYTE – Plano nga manhatag hin bugas ngan fuel subsidy han Lokal nga Gobyerno han Matag-ob, Leyte ha mga nasasakupan hini.
An makakakarawat hin bugas in an mga pamilya nga Matag-obanon, samtang an fuel subsidy naman in mga aada ha sektor han transportasyon.
Sumala kan Matag-ob, Leyte Mayor Bernie Tacoy, naghihimo na hira hin mga pitad agud mabaton an inaabat nga krisis yana han nasud resulta han nagpapadayon nga kasamok ha Middle East, sugad han ira plano nga panhatag hin bugas ngan fuel subsidy ha mga Matag-obanon.
Dugang pa hini, imbes nga cash assistance an ira ighahatag ha mga taga-sektor han transportasyon, ig paagi nira ini ha voucher, kun diin pwede nira ig-claim ha partner nga gasolinahan han LGU.
Makakakarawat naman hin tag-P3,000 an kada rehistrado nga driver o operator ha nasabi nga lugar, samtang dire naman makakakuha adton mga waray rehistro.
Sumala pa kan Mayor Tacoy, igpapaagi ini nira ha voucher agud masigurado nga magagamit ini ha pan-gasolina ngan dire mahingangadto ha iba nga panuyuan.
Ada naman ha sobra 60 an mga rehistrado nga habal-habal drivers ngan 44 naman an Bajaj drivers.
Samtang, nakatalaan naman igpanhatag an nasabi nga bulig kahuman hiton Semana Santa.
