TACLOBAN CITY – Iginpapahibaro han Office of the Senior Citizens Affairs (OSCA) Tacloban nga abilable na ha ira opisina an mga Free Movies Admission Booklet para ha mga rehistrado nga senior citizens han syudad.
An nasabi nga booklet an mahihimo nga ticket han mga senior citizens ha libre nga pag kita hin sine kada-Lunes ha mga sinehan kun diin, usa ini ha mga benepisyo nga makakarawat han mga senior citizens nga residente han Tacloban agud matagan an mga ini hin kaliawan.
Sumala kan Tacloban City Office of the Senior Citizens Affairs Head Flordelis Menzon, puydi na kumadto ha ira buhatan an mga senior citizens pagkuha han nasabi nga mga booklet kun diin kinahanglan la ipakita an ira OSCA ID kun hira in makuha han mga booklet.
Dugang pa hini, pinaagi han pagkakamay-ada hini nga booklet in makakabulig ini nga matagan hin higayon an mga kalagsan nga magkaada hin oras para ha ira kalugaringon, makaglipay, sugad man makapahuway ha mga trabahuon ha tagsa-tagsa nga panimalay.
Ha lain nga bahin, nakalatalaan naman nga kumarawat yana nga bulan han Hulyo an mga kalagsan nga nag eedad hin 80, 85, 90, ngan 95 hin cash incentives pinaagi han National Commission of Senior Citizens (NCSC).
Gin pahayag pa hini nga nakatalaan gihapon nga ig pa gawas han mao nga opisina an bago nga mga senior citizens ID na baga baga hin ATM card iton pustora.
(Via Bombo Nina Magpili)
