NATIONAL – Ha botos nga 22 nga pabor, waray kumontra, ngan waray nag-abstain, lusot na ha ikatulo ngan katapusan nga pagbasa han Senador an paghahatag hin libre nga funeral services ha mga kablas nga pamilya.
Gin isponsoran ni Senadora Imee Marcos an Senate Bill No. 2965, nga kilala kumo Free Funeral Services Act.
Subay ha balaudnon, an mga kablas in natudlok ha mga pamilya nga an kita in mas habubo ha gintalaan nga poverty threshold ng National Economic and Development Authority (NEDA) o dire kaya batunon an ira pangunahon nga panginahanglan sugad han pagkaon, panlawas, edukasyon, pabahay, ngan iba pa nga nga basaranan han panginahanglan ha kinabuhi, subay ha Republic Act No. 8425, o an Social Reform and Poverty Alleviation Act.
An libre nga funeral services in ighahatag ha mga pamilya ngada ha crisis situation, subay ha pagdetermina han Department of Social Welfare and Development (DSWD).
An kwalipikado nga kablas nga pamilya in makakarawat han tinatawag nga “Indigent Funeral Package,” nga ginkakalakipan han mga masunod:
– Pagproseso han funeral documents
– Embalsamo
– Serbisyo han paglubong o interment
– Transportasyon
– Serbisyo nga cremation ngan inurnment kaupod an paghahatag hin lungon, urn, o lugar han paglubong o seremonya
