TACLOBAN CITY – Patay na han mahikit-an an usa nga foreign national ha sulod han usa nga apartelle ha Brgy. 83-B Cogon San Jose, Tacloban City, dida han nakalabay nga adlaw.
Ginkilala an biktima kan alyas Tim, 43-anyos an pangidaron, ngan usa nga retired US army.
Sumala kan Tacloban City Police Office City Affairs & Development Unit Head, PLt.Col. Allan Camasin, napagplanuhan hine ngan han kalive-in partner hine nga book ha nasabi nga apartelle kumo pangandaman han naka-schedule nga power interruption ha syudad.
Basar han imbestigasyon, kulop han Marso 14 pala han mag book an mga ine ha nasabi nga apartelle agud makag-andam han nakatalaan nga power interruption dida han nakalabay nga Dominggo, Marso 16.
Pero nauna na daw an biktima ha pagcheck-in ha nasabi nga apartelle ngan nag-ininom na ine hin makahurubog nga irimnon ugsa paman umabot an live-in partner hine.
Samtang, sumala han live-in partner han biktima, alas-7 na han gab-i han Marso 14 han lumanat hira han iya mga anak ha apartelle kun diin pag-abot han mga ine in nag-iinom pa daw an biktima ngan naka-ubos na ine hin duha nga long neck nga irimnon, sanglit nag-book nala hira hin iba nga kwarto.
Pagka-aga han Marso 15, Sabado, ginsasangpit na han live-in partner an biktima pero waray daw ine babaton, kun diin dida han pag-abri han kwarto in nahikit-an nala an biktima nga nakulob ha iya higdaan ngan waray na kinabuhi.
Nagawas naman ha resulta han ginbuhat nga examination nga intoxication o duro nga kahubugan an rason han kamatayon hine.
Waray naman nakikita nga foul play ha nasabi nga insidente.
