ALMERIA, BILIRAN – Naglulutaw ngan patay na han matad-an an usa nga Israeli national ha usa nga beach ha Brgy. Matanggo, Almeria, Biliran, kakulop han alas-8 han aga.
Ginkilala an biktima nga usa lalaki, 74-anyos an pangidaron, ngan suki nga costumer han usa nga beach resort ha Brgy. Talahid, Almeria, Biliran.
Sumala kan Almeria Municipal Police Station Acting Chief of Police, PCpt. Benigno Avila, nakahiaran na han biktima nga pirme kumarigo ha dagat kada adlaw kada nagbabakasyon ine ha nasabi nga lugar.
Dida han nakalabay nga Mayo 19, usa nga staff han beach resort nga gin uukyan han biktima an nakakita ha biktima nga kumarigo ine ha dagat mga banda alas-11 han tiurudto, pero waray na daw ine makabalik.
Mahitungod nga nahipausa na an tag-iya han resort nga waray paman babalik an biktima in nagreport na ine ha mga barangay officials ngan ha coast guard nga harani ha lugar.
Dayun naman nga nagdumara hin search and rescue operation an mga otoridad pero waray na ine mahikit-e.
Kakulop han alas-8 han aga, natad-an an lawas han biktima hin usa nga paru-pangisda nga naglulutaw-lutaw na.
Nahibaruan naman nga mayda history hin fatigue an nasabi nga biktima.
Gin deklara naman han Rural Health Unit han Almeria nga pagkalumos an rason han kamatayon han biktima.
