NATIONAL NEWS– Sumaka na ha US$7.1 bilyon an kabug-usan nga net foreign direct investments (FDI) nga sumulod ha Pilipinas tikang Enero – Nobyembre 2025.
Subay ha iginpagawas nga datos han Bangko Sentral ng Pilipinas (BSP), nagpapakita la gihapon hin kumpiyansa an mga langyawanon nga negosyante ha ekonomiya han nasud.
Para ha bulan han Nobyembre 2025, nakapagtala an nasud hin net inflows nga nagkakantidad hin US$897 milyon.
Nagawas ha report nga an South Korea an nanguna nga gintikangan han ponod han nasabi nga bulan, kun diin dako nga parte han ira ginpuhunan in igin-alutaga ha manufacturing industry.
An mga sumulod nga kapital in pangunahon nga igin-alutaga ha pagpaparibhong han manufacturing, wholesale and retail trade, sugadman an real estate.
Subay ha mga eksperto, an padayon nga pagpakusog han FDI in krusyal ha pagpapadagmit han produksyon ngan pag-aabre han mas damo nga mga oportunidad ha trabaho ha nasud.
