TACLOBAN CITY – Nagdumara hin usa nga art competition an Bureau of Fisheries and Aquatic Resources Eastern Visayas ha LGU Sogod Municipal Grounds ha Southern Leyte, dida han nakalabay nga Abril 25.
An tema han kompetisyon in FISHCORExhibit: Raising Awareness on Fisheries and Coastal Resiliency Art Competition Regional Selection.
Gin partisiparan hin napulo nga istudyante tikang ha Southern Leyte State University (SLSU) Bontoc Campus ngan Sogod Main Campus an nasabi nga paisan-isan, kun diin gamit la han mga ine an ghost nets, mga scrap boat materials, ngan iba pa nga mga recycled materials.
Ha nasabi nga paisan-isan in nakuha ni Rhoegie Ibañez, usa nga Marine Biology student han SLSU Bontoc Campus, an first place, kun diin an art piece hine nga gintituluhan hin “Pag-ugmad” in gin gamitan hin mga basura tikang ha kadagatan ngan iba pa nga recycled nga gamit—ginpapakita hine nga an basura in pwede mahimo nga obra nga nasuporta ha mahimsog nga ‘ecosystem’ ngan lokal nga pangisdaan.
Nagkag-uli naman ine hin P15,000 nga cash prize, samtang an 2nd placer in mayda liwat P10,000, ngan an 3rd placer in kumarawat naman hin P5,000, samtang an pito nga iba pa in kumarawat naman hin consolation prize nga tag-P3,000 kada usa.
Sumala kan Bureau of Fisheries and Aquatic Resources Eastern Visayas Information Officer, Christine Gresola, gindumara an FishCorExhibit agud mapakusog pa an pagpasarang han impormasyon kasumpay han pag hirot ngan panginano han mga kadagatan ngan sugadman han mga fishery resources.
An FishCorExhibit in usa nga pito-katuig nga inisyatiba han pagpadukwag nga igpapatuman han BFAR, pinaagi han suporta han World Bank, ha sulod han FMA 6 ngan 9.
An Southern Leyte, kumo nag-uusaan nga probinsya nga membro han FMA 9 ha rehiyon, in makakakarawat hin suporta ha rehabilitasyon para han mga urukyan ha baybayon ngan kadagatan, imprastraktura nga climate-resilient ha pangisda, ayuda ha pagpadukwag han negosyo ha pakabuhi, ngan suporta ha pagpadukwag han paghimo han mga pangisdaan ha bug-os nga panahon han proyekto.
