TACLOBAN CITY – Patay an usa nga fish dealer ha Guiuan, Eastern Samar mahuman ini nga pagpamumusilon han waray pa kakilal-i nga riding in tandem ha Brgy. 71 Naga-Naga Tacloban City.
Sumala kan Pol. Maj. Marjorie Manuta, tagapagyakan han Tacloban City Police Office, ginkilala an biktima nga hi Roel Bacunawa, 46 anyos an pangidaron, fish vendor ngan residente han St. Genevieve Village Brgy. Tagpuro, Guiuan, Eastern Samar.
Basar ha inisyal nga imbestigasyon, upod han biktima an iya live-in partner nga hi Maria Cabacaba ngan driver han ira truck nga hi Jose Aboga.
Tikadto unta an biktima ngan an iya mga kaupod ha Tanauan, Leyte para magdeliver hin isda pero humapit anay an mga ini ha Naga-Naga Tacloban han tigda nala nga pagpamumusilon an biktima han mga suspek nga sakay ha single nga motorsiklo.
Dayon naman nga umeskapo an mga suspek mahuman an ginbuhat nga panmumusil.
Ha pagkayana in padayon an gindudumara nga imbestigasyon ngan operasyon han mga kapulisan agud nga matudlok an nagpapaluyo ha mao nga krimen.
