TACLOBAN CITY- Gindeliver na yana nga adlaw ha mga eskwelahan kumo polling precinct an gagamiton nga mga Automated Counting Machine (ACMs) para hiton election 2025.
Sumala kan Dr. Nilo Eder, Information Officer, Deped Tacloban City Division, yana gihapon nga adlaw an final testing and sealing han nasabi nga mga counting machine, ngan utro ine aabrehan ha adlaw na hiton piniliay.
Maabot naman ha 32 nga mga public schools ha ilarom hiton DepEd Tacloban City Division an gagamiton kumo bobotaran han mga botante ha maabot nga Mayo 12, 2025.
Ada naman ha 968, nga mga teaching ngan non-teaching personnel an nakatalaan nga magseserbi dinhi ha Tacloban City.
Ha mao nga ihap maabot ha 880 dinhi an mga teaching personnel, samtang 88 naman an mga non-teaching personnel.
Ginpaangbit pa hine nga ginhihingita nira nga tumanon an ira napagkasarabutan nga dayon ighatag an honorarium ha mga magturotdo ha mao gihapon nga adlaw kahuman han ira serbisyo.
