HEALTH NEWS – Nagpahimatngun an Food and Drug Administration (FDA) ha publiko bahin ha mga produkto nga alkohol nga mayda sakot nga delikado para ha panlawas.
Ginkikilala naman daw han buhatan an papel yana han alkohol komo disinfectant ala kontra han virus han COVID-19, pero dapat daw nga masiguro nga talwas ha publiko kun ano an mayda han mao nga produkto.
Subay ha opisyal nga kinahanglan nga siguraduhon nga 60-percent an ethyl o isoprophyl alcohol content han mga ginpapalit nga mga hand sanitizers.
Para naman ha mga liquid alcohol, dapat 70-percent han pareho nga mga sakot an nakahalo ha alcohol.
Sagdun ni Domingo nga diri na pumalit hin mga alcohol products kun mayda sakot ini nga ethyl acetate nga usa nga klase hin industrial grade ethanol.
Posible daw ini nga magdurot hin skin irritation, pagkabuta ngan pagkamatay an sayup nga pagamit han ginbabawal nga produkto nga alkohol.
Agud naman nga mabaruan kun talwas ba o diri an ginpalit nga alkohol, sagdun han FDA Chief nga panginanuon anay kun sakto an label ngan packaging han produkto.
Dapat gihapon daw makit-an ha burutangan an instruction ha paggamit, listahan han mga sakot, special precaution o mga pahinumdum; pati na an ngaran ngan address han kompanya nga naghimo.
Subay ha record han FDA, maaabot ha 1,570 an rehistrado nga brand han alkohol ha Pilipinas.
