TACLOBAN CITY — Guinklaro han Food and Drugs Administration (FDA) nga an kawaray licensed pharmacists an usa ha dako nga problema han mga drugstore nga nag ooperate ha Sinirangan Bisayas.
Guinmalatumat ni FDA Deputy Director General Emilio Polig Jr. nga nasipatan ini nira nga problema ha rehiyon mahuman nga guinpanginano han mga ini an mga stablishmento nga nagbabaligya hin medisina.
Kalakip han mga guinpanginano han FDA an 727 nga drug stores, 269 nga establishmento nga nagbabaligya hin food supplements, 34 nga medical device traders ngan 15 nga cosmetic stores.
Basi ha Republic Act No. 10918, o an Philippine Pharmacy Act of 2015, nakahipatik nga an licensed pharmacists la an may katungod nga magpagawas hin medicina ha sulod han lisensyado nga stablishmento.
Gawas la han kawaray lisensyado nga pharmacists, nasipatan guihapon han FDA nga pira nga stablishmento an nagbabaligya hin diri rehistrado nga produkto panlawas, kawaray lisensya ha pag-operate ngan pag-operate nga may expired nga lisensya.
Guinduon naman ni FDA Director General Nela Charade Galang-Puno nga an kahamubo han sweldo an hinungdan ha kawaray o paghihingulang hin lisensyado nga pharmacist.
Samtang, nagpahinumdom naman an FDA ha publiko nga maging mabinantayon alakontra ha mga peke nga produkto para ha katalwasan han panlawsas.
