TACLOBAN CITY – Nagpalusad hin Executive Order an bungto han San Miguel Leyte, ine in may paghisumpay ha distance learning han mga estudyante tungod ha kapaso hiton panahon.
Sumala kan Atty. Norman Sabdo Municpal Mayor han San Miguel Leyte, mahitungod daw han dire malikayan nga kapaso hiton panahon, in may-ada na magturutdo nga na heat stroke.
Subay han mao nga alkalde, nagkasarabutan han ngatanan nga stakeholders ha education ngan nagkaurusa nga mas paborable ngan dako nga bulig ha mga magturutdo ngan estudyante an pagkamay-ada hin distance learning.
Ginmamando ha mao nga Executive Order nga ha bungto han San Miguel, Leyte in kinada aga la itun klase samtang pagkakulop naman in modular sessions nga pagsiguro liwat nga an kalidad ha education in dire duro nga makomprimiso o maapektaran.
Dugang pa hine, mahugot iton coordination han mao nga bungto ha DepEd ngan kun pananglitan daw ine in mabago in igrerekomenda utro ine han mga stakeholders ha DepEd.
Ginpahibaro gihapon han mao nga opisyal, nga ha kada-adlaw in pirme may-ada na-irereport ha Rural Health Unit han San Miguel mapa studyante man o magturotdo tungod han kapaso han panahon.
