Nagpagawas na hin usa nga pormal nga pahayag hi anay Philippine National Police (PNP) Chief Nicolas Torre III ha iya opisyal nga Facebook account.
Pinaagi han iya post ha social media, ginatagan hin pagklaro han anay tagmangulo han Pambansang Pulisya ng Pilipinas an mga espekulasyon kasumpay ha iya relasyon kan Presidente Ferdinand Marcos Jr.
Gin sigurado ni Torre nga waray hiya anuman nga maraot nga buot ha Presidente.
Labot pa hine, nagpaabot gihapon hin pasasalamat hi anay Chief Torre ha ngatanan han mga indibidwal nga nagpahayag han iya suporta ha iya ha butnga han mga panhitabo.
Sugadman, ha iya mensahe, umapela an anay PNP Chief ha publiko nga dire hiya kaluoyan o tagan hin duro nga simpatya.
Imbes nga kaluoyan, iginduon ni Torre nga mas kinahanglan tagan hin pansin ngan kaawaan an mga Pilipino nga padayon nga nag-aantos nga nabibiktima han paluyo-luyo nga pagbaha ha magkaduru-dilain nga parte han nasud.
