WASHINGTON, D.C. – Humilaba pa an listahan han mga riko ngan kilala nga personalidad ha bug-os nga nasud nga nangaranan ha imbestigasyon kasumpay ha tumalikod nga financier ngan convicted sex offender nga hi Jeffrey Epstein, mahuman ginpagawas han Estados Unidos an panibag-o nga page han dokumento dida han ika-30 han Enero.
An pinakabag-o nga ginpagawas nga mga record ha gintawag nga Epstein Files in ginbubug-os han 3-milyon nga page han dokumento, sobra 108,000 nga litrato, ngan haros 2,000 video nga nagsusulod han mga email, mensahe, record han biyahe ngan banko.
Kaupod ha mga nangaranan ha mga dokumento an pira nga kilala nga personalidad sugad kanda tech billionaires Elon Musk ngan Bill Gates, negosyante nga hi Richard Branson, anay ngan presente nga mga lider ha pulitika kaupod hira Donald Trump ngan Bill Clinton, pati mga opisyal, akademiko, ngan celebrity tikang ha magkadurudilain nga nasud.
Ha mga dokumento in lumutaw an pagbalyuay hin mensahe ha email nira Elon Musk ngan Jeffrey Epstein dida han 2012 nga may kasumpay ha usa nga “Island Party” nga gintatag-iyahan ni Epstein, butang nga mahugot nga ginpanhimuwa ni Musk ngan ginmalatumat nga waray hiya kumadto ha nasabi nga private island.
Samtang, gumawas gihapon ha record an ngaran ni US Pres. Donald Trump kun diin nangaranan ini hin makapira ka-higayon sumala ha FBI, pero kadam-an ha mga ini in dire beripikado sumala ha mga otoridad.
Ginklaro naman han US Department of Justice nga an pagkakangarani ha dokumento in dire otomatiko nga karuyag-signgon in dabi na ha illegal nga buruhaton, ngan damo ha mga personalidad an mahugot nga ginbaribadan an bisan ano nga direkta nga pakikipagsumpayan ha mga krimen ni Epstein.
