INTERNATIONAL – Gin-amin ni Elon Musk nga nagbabasol hiya ha iya mga post kontra kan US Pres. Donald Trump ha butnga han ira dire pagkaka-intindihay ha social media.
Manunumduman nga nagtikang an pag-away han duha mahuman nga tawagon ni Musk an tax bill han administrasyon ni Trump nga usa nga “disgusting abomination,” ngan hangyo hini ha publiko nga balabgan ini.
Nagtutuo mangud hi Musk nga magdudurot ine hin resesyon ha ika-duha nga hugna han tuig.
Nagpasarang gihapon hi Musk hin dire beripekado nga pahayag nga kaupod hi Trump ha mga dokumento kasumpay kan Jeffrey Epsteinb, nga kun diin, ginpanhimuwa naman ini han White House.
Kumo baton, gintawag ni Trump nga “waray respeto” hi Musk ngan nagtarhog nga tatanggalan hin mga kontrata ha gobyerno an mga kumpanya hini, sugad han SpaceX nga may kantidad nga $38 bilyon.
Sumala naman kan US Vice President JD Vance nga diri karuyag han presidente nga magtikagrabe pa an ira away, ngan an administrasyon in nagtatalinguha nga mahibalik an maupay nga relasyon ha usa han pinakadako nga campaign donors han administrasyon ni Trump.
