TACLOBAN CITY – Ginkakabarak-an han usa nga ekonomista ha Sinirangan Bisayas nga dako an magigin epekto ha ekonomiya ngan turismo an natatabo nga krisis han lana ha nasud.
Sumala kan UP Tacloban College Dvision of Social Sciences, Economics, Assistant Professor, Gerwyn Enerlan, kun mag padayon ha duha ngada ha tulo ka-bulan an natatabo nga krisis han lana in dehado o dako an tyansa nga lumuya an ekonomiya han nasud dugangan pa han diri maupay nga sitwasyon han ekonomiya han nakalabay nga tuig.
Dugang pa hini nga an mga subsidiya nga ginhahatag han gobyerno in diri makakabulig ha ekonomiya mahitungod nga an mabubuligan la hini in an mga nagamit hin gasolina partikular na an mga PUV drivers.
Eksplikar han ekonomista nga mayayakan nga nakakabulig ha ekonomiya an usa nga pitad kun ini in natatagamtaman han ngatanan. Sugad, ngatanan nga tawo in nakakapalit o diri nalilimitaran an mga ini nga gumi-os.
Sumala pa hini, kun an paghitaas han presyo han lana in nalilimitaran an mga tawo ha pag gi-os sugad ha pagbiyahe ngan pag palit hini, in laoman pagtikang han pagluya han ekonomiya.
Samtang, pahinumdom naman hini ha publiko, nga mag-andam pa ha mga masunod nga semana o bulan mahitungod nga kun magpapadayon an krisis ha lana in lauman an mas maiha o pag gawas han negatibo nga epekto hini ha merkado ngan ekonomiya han nasud, sugad an paghataas han pasahe o presyo han pangunahon nga mga papliton.
(via Bombo Nina Magpili)
