NATIONAL–Nanawagan an Organsation for Economic Co-operation and Development (OECD) ha pangobyernuhan ha Pilipinas nga ibanan an mga fiscal incentives ngan an hinay hinay nga pagtanggal han mga VAT exemptions para ha senior citizens ngan private schools agud nga maibanan an utang ngan igpaguti an budget deficit.
Sumala ha OECD, kinhanglan han Pilipinas nga igpadagmit an fiscal consolidation ha pinaagi hin mas maupay nga pangongolekta hin buhis, ngan mas epektibo nga pag-gastos agud nga atimanon an public debt ha nasud.
Ginabiso han grupo nga hinay hinayon na an pagtanggal han mga VAT exemptions ha mga pribado nga healthcare, education, ngan senior citizens, kadungan han targheted social transfers, ngan pag-phase out han corporate tax holidays.
Labot la hine, ginsiuhestyon gihapon han OECD an pagpapatindog hin tiered social protection system, upod an universal basic pension para ha ngatanan nga kinalagsan, ngan pagbalhin han financing han universal healthcare tikang ha social security contributions pakadto ha general taxes.
kalakip gihapon ha rekomendasyon an reporma ha public administration ngan ha pension system han military ngan uniformed personnel agud nga igpaupay an efficiency han pag-gastos.
Ginbabanabana han OECD, nga maaabot ha 5.1% an paguswag han Gross Domestic Product (GDP) han Pilipinas ha 2026, ngan 5.8% ha 2027, basar ha habubo nga inflation rate ngan mas haluag nga financial consitions. Sugad paman, ginahimatngon han grupo nga nakaatubang an nasud ha “significant headwinds” sugad hiton nahinay nga populasyon ngan nagduduroy nga ayat tikang ha climate change.
Agud nga makab-ot an ambisy on han “AmBisyon Natin 2040” nga triple an per capita income ha $11,000, ginmalatumat naman hine nga kinahanglan nga humitaas an average annual productivity growth tikang ha 4.5% ha 5.2% hasta 2040. Importante daw gihapon nga makuha han nasud an GDP growth average hine ha 6% tikang 2025 hasta 2040.
