TACLOBAN CITY- Naka-full alert na an Eastern Samar Police Provincial Office, para ha tiarabot nga STS Tino, nga ginlalauman maglalandfall ha Guiuan ngan Mercedes Eastern Samar.
Sumala kan PCol. Ernesto Macasil, Provincial Director,Eastern Samar Police Provincial Office, mayda na 15 nga pamilya an namagbakwit ha Eastern Samar State University (ESSU), kun diin mayda 50 nga mga indibidwal.
Ginlalauman naman nira nga madudugangan pa ine nga mga nagbakwit ha masunod nga mga oras.
Padayon gihapon an ira ginhihimo nga panginano ha kakarsadahan agud nga waray makabalong ha paghatod hiton mga relief operation.
Ha pagkayana, mayda pa kuryente ha nasabi nga lugar, ngan waray gihapon may nahipatik nga mga nag panic-buying matungod ha possible nga epekto han bagyo.
Nananawagan naman ine ha publiko, nga magsunod ha mga iginpapatuman nga aludayday han mga otoridad, ngan likayan na an bumiyahe ha lawod agud nga dire an mga ine mahingadto ha kadelikaduhan.
Gin-abisuhan gihapon an mga taga Guiuan ngan Mercedes, magin an mga kahigrani nga lugar, nga dayon na magbakwit ha mga evacuation centers nga harani ha ira mga lugar, ngan dire na hulaton pa nga kumusog an hangin nga uran dara ni Severe Tropical Storm Tino.
