Ginkumpirma ha International Criminal Court (ICC) nga kinahanglan personal nga umatubang ha hearing hi anay Presidente Rodrigo Duterte para ha kaso nga crimes against humanity mahuman kumpirmahon han Pre-Trial Chamber I an mga charges kontra ha iya.
Subay ha ICC, klaro ha Rome Statute nga kinahanglan aadto an akusado ha panahon han trial.
Manunumduman nga umatender an anay presidente ha Pre-Trial Chamber dida han Marso 2025, pero waray na ini umatender ha mga sumunod nga hearing, kalakip an confirmaton of charges proceedings dida han Pebrero.
Ha ilarom han mga patakaran han ICC, pwede nga temporaryo nga tanggalon an akusado ha courtroom in kaso makadelatar hiya ha hearning, pero tatagaan la gihapon ini hin higayon nga sundan an proceedings pinaagi han communication technology ngan makigsumpayan ha iya abogado.
Sugadman, ginmalatumat han korte nga an sugad nga pitad in gagamiton la ha “exceptional circumstances.”
Hi Duterte in aada ha kostudiya han ICC tikang pa hadton Marso 2025 kasumpay ha kaso nga may paghisumpay ha madugo nga ‘war on drugs’ ha iya administrasyon, pati na gihapon an mga alegasyon nga pagpatay hadton alkalde pa hiya han Davao City.
