TACLOBAN CITY – Padayon an ginbubuhat nga operasyon nga imbestigasyon ngan mga kasundaluhan mahuman an natabo nga engkwentro ala kontra ha mga rebelde nga grupo ha Brgy. Roxas, Catubig Northern Samar kun diin duha nga mga menor de edad an napatay ngan samaran an usa pa nga sibilyan nga nadabi la ha mao nga insidente.
Ha ginpagawas nga report han 803rd Brigade, duha nga mga rebelde gihapon an napatay ha mao nga engkwentro.
Sumala kan Pol. Capt. Noel Unay, Chief of Police han Catubig MPS, nagpapatrolya an tropa han 803rd Brigade han makaengkwentro han mga ini an mao nga grupo hin mga rebelde nga gintutuuhan nga mga miyembro han Front Committee 15 han Sub-Regional Committee “Arctic” han Eastern Visayas Regional Party Committee.
Basar pa ha report, samtang nagpapatrolya an mga sundalo ha mao nga lugar ngan samtang kaistorya an pira nga mga sibilyan in tigda nala hira nga ginpauranan hin bala han rebelde nga grupo.
Ha mao nga engkwentro, duha nga rebelde an ira napusil pero han makit-an nira nga naigo na gihapon hin bala an pira nga sibilyan, dayon anay nira nga gintagan hin immediate first aid an mga ini samtang nakakakalagiw naman an mga rebelde.
Humagos hin haros 20 minutos an naging balyuay hin buto tikang han magkaluyo nga kampo.
Dead on the spot an 12 anyos nga hi Andre Mercado, samaran naman an 26 anyos nga hi Arlie Rebay samtang usa pa nga 13 anyos nga Leandro Alivio an namatay ha ospital mahitungod han naangkon nga igo han bala ha iya lawas.
Ha pagkayana in padayon naman an ginbubuhat nga operasyon han mga militar ngan nagdeploy na gihapon hin helicopters hin Fact Finding team agud nga maimbestigaran ngan matudlok an mga rebelde nga nagpapaluyo ha mao nga insidente.
Samtang, ginsiguro naman ni Gov. Edwin Marino Ongchuan ngan Catubig Mayor Galahad Vicencio an suporta para ha mga pamilya han mga biktima han mao nga madugo nga engkwentro.
