TACLOBAN CITY — Patay mahuman pagpaninigbason an duha nga menor-de-edad nga makadto la unta ha umhanan ha Brgy. Sta Rita, Marabut Samar, samtang nakatalwas ngan nagpapaupay naman an usa pa nga menor-de-edad ha Eastern Visayas Medical Center (EVMC).
An mga biktima nga namatay in usa nga 12 anyos nga babaye ngan 13 anyos nga lalake, samtang an nakatalwas in usa nga 9 anyos nga babaye nga pareho an mga ini mga estudyante ngan nag-uukoy la mismo ha nasabi nga baranggay.
Sumala kan PLt. Vincent Wendell Marteja, Chief of Police han Marabut Munisipal Police Station, lumusad ha bukid ngan nangaro hin bulig an 9 anyos nga babaye kun diin damo an mga samad hini ha magkalain-lain nga parte han iya lawas.
Basar ha inisyal nga imbestigasyon, pumakadto an nasabi nga mga menor-de-edad ha umhanan agud manguha hin duma kun diin pag-abot nira ha nasabi nga tanuman in nakadto na an suspek nga kinilala kan “alyas” Mackie.
Ha dire mabaruan nga rason in ginpaninigbas an mga biktima kun diin nakaiskapo an 9 anyos nga babaye ngan nangaro hin bulig.
Nakag-angkon hin grabe nga mga samad an mga biktima rason han kaawat han kinabuhi han mga ine.
Ha pagkayana in ginhahalpat na an suspek nga umiskapo mahuman la an mao nga insidente ngan gin-aandam na gihapon an kaangayan nga kaso kontra hini.
