MAPANAS, NORTHERN SAMAR – Patay an duha nga membro han walhun nga grupo ha nahitabo nga engkwentro ha butnga han tropa han militar ngan 10 nga rebelde ha tay-aw nga lugar han Brgy. San Jose, Mapanas, Northern Samar.
Nahitabo an engkwentro durante han pagdudumara hin focused military operations mahuman makarawat an mga report tikang ha mga concerned citizens, ngan nag-iha an engkwento hin sobra usa kaoras.
Ginkilala an mga ine kan alyas Ibaro, residente han Brgy. Magsaysay, Mapanas, Northern Samar ngan alyas Sami, residente han Brgy. Senonogan de Tubang, Silvino Lubos, Northern Samar.
Sumala kan 78th Infantry Battalion, 8th Infantry Division, Philippine Army Civil Military Operation Officer, 2Lt. Mark Francis Señoron, an mga rebelde in membro han Squad 2, Sub-Regional Guerilla Unit (SRGU), Communist Code LAYSAN, Sub Regional Committee (SRC) ARCTIC, Eastern Visayas Regional Party Committee (EVRPC).
Narekober gihapon han militar ha lugar han engkwentro an duha nga M16 riffles, 175 kabug-os hin 5.56 ngan 87 kabug-os han M14 ammunitions, lima nga long magazines, kaupod an iba pa nga war materials.
Samtang, gintagan naman hin hapsay nga paglubong an duha nga membro han walhun nga grupo nga namatay ha engkwentro mahitungod na gihapon nga waray pamilya nga nag-angkon han nasabi nga mga patay nga lawas, pero ginpahibaro an mga ine.
Padayon gihapon nga gin aghat han nasabi ng opisyal an mga nasasalin nga rebelde nga bumalik na ha gobyerno agud malikayan sugad pa nga mga panhitabo.
