TACLOBAN CITY – Ginpahayag han Department of Trade and Industry (DTI) Regional Office 8 nga mahugot an ira monitoring ha mga supermarkets ha rehiyon agud nga masiguro nga iginpapatuman hini hin sakto an napagkasarabutan nga suggested retail price han kada kilo han asukar.
Una hini, napagkasarabutan han gobyerno ngan han mga tag-iya han Robinsons Supermarket, SM Supermarket, Puregold Supermarket ngan S&R Membership Shopping nga himoon nga P70 nala an presyo han kada kilo han ira ginbabaligya nga asukar.
Sumala kan Anthea Aivi Borbon-Ancheta, tagapagyakan han DTI Regional Office 8, nagkaada na hira hin initial nga monitoring ha mao nga mga participating supermarkets nga nag-iimplementar na han mao nga P70 per kilo nga SRP han asukar.
Mayda gihapon kasarabutan an DTI ha mao nga mga supermarkets nga magpatuman hin limit ha kada purchase han mga konsumidor agud nga malikayan an hoarding tungod ha habubo nga presyo hini.
