TACLOBAN CITY– Gin-aaghat hiton Department of Trade and Industry DTI- Eastern Visayas, an publiko nga maghinay-hinay na mamalit yana para hiton ira gagamiton ha pasko ngan bag-o nga tuig sunod nga bulan.
Sumala kan Anthea Aivie Borbon Ancheta, Information Officer DTI Regional Office Vlll, pira ha mga government workers in naka-karawat na han ira mga bonuses, sanglit nga dire na maghulat pa an mga ine ha bulan hiton Disyembre.
Dugang pa hine, nagpagawas na an ira buhatan hiton price guide para ha mga Noche Buena items, kun diin ha kabug-usan nga 256 items nga pan Noche Buena, 129 products dinhe an waray mag umento, 6 nga product an nagpatuman hin pagpahamubo han presyo.
Samtang 95 naman an namag-increase han ira presyo, pero lauman han mga konsumidor nga dire an mga ine malahos ha 10% sanglit minimal la ine nga pag-umento.
Usa ha mga rason nga nakit-an hiton ira buhatan, nga nagpatuman hin pag-umento an pira nga mga produkto, matungod nga nag-increase gihapon an ira gingagamit nag mga raw materials.
Nagsuhestyon naman ine ha mga konsumidor, nga mas maupay paliton adton mga nagpaka bundle na ha usa nga packaging, agud nga makatipid an mga ine.
