TACLOBAN CITY – Ginpahibaro han Department of Trade Industry Region 8 (DTI-8), nga dire gud sugad kahitaas an ihap nga ira naka-karawat nga mga reklamo kasumpay ha mga nagbabaligya ngan pangunguwat online ha mga costumer dinhe ha rehiyon.
Ine in mahuman nga gumawas an report ha national nga damo nga mga reklamo an nakarawat han DTI-National, kasumpay ha mga panguwat nga tikang ha mga online seller ngada ha mga konsumedor.
Sumala kan Eleonor Etulle, Chief Consumers Protection Division DTI Regional Office 8, nga pananglitan naman nga mayda natatabo nga sugad in gintatagan naman ine nira hin solusyon kun diin ginpapagsabot an seller ngan an buyer agud nga dire na mas magin grabe pa an sitwasyon.
Dugang pa han mao nga opisyal, nadepende naman ha sabot han duha nga partido kun pati-unano masusolbar an ira problema.
Nagpahimatngon naman ine ha publiko, nga panginanuon anay an mga items partikular online matungod nga kaudgan nga mga items online in dire tugma ha aktwal nga hitsura.
Nanawagan gihapon ine ha mga nag-oonline seller nga magin responsable ha ira mga ginbabaligya, kun diin siguraduhon ngan maupay an quality nga ighahatag ha mga konsumedor agud nga dire magkamayda hin mga problema.
