TINAMBAC, CAMARINES SUR – Dayon nga umaksyon an Department of Social Welfare and Development agud buligan an usa nga 11-anyos nga bata nga babaye tikang Camarines Sur nga nagsurat kan Presidente Ferdinand Marcos Jr. kasumpay han pan-aabuso han usa nga opisyal han barangay.
Ginkumpirma ni DSWD Secretary Rex Gatchalian nga nakigharampang hiya ha bata ngan ha tagmangulo han shelter nga nakupkop hini, kasunod ha mando han Presidente nga solusyonan an sitwasyon.
Ginbuligan gihapon han DSWD an Redeemer Homeless Mission, usa nga shelter nga nagsisirbi nga temporaryo nga panimalay han mga pamilya nga naapektraran han kakurian ngan kalamidad. Imbes nga ipasara mahitungod han kakulangan han papeles, ginbuligan han ahensya an pasilidad nga makumpleto an mga kinahanglanon nga permit.
Sumala ha pira nga residente han shelter, nakakaabat gihapon hira hin panha-harass, kaupod an pag-utod han kuryente ngan suplay han tubig kun diin, i-imbestigaran naman ini han mga otoridad.
Samtang, ginbuligan gihapon han DSWD an usa nga bata nga may special needs nga paurutro nga ginlugos han anak han usa nga opisyal han barangay. Padayon nga gintatagan hin pinansyal ngan psychosocial nga bulig an biktima ngan an pamilya hini.
