NATIONAL–Ginaalegar nga ginkakalipay han mga pamilya han mga drug war victims nga mayada na hira tinaglawas ha International Criminal Court (ICC).
Ini in kahuman han presentasyon han common legal representatives han drug war victims nga hi Atty. Joel Butuyan nga nagpresenta ha hinanakit ngan pag-antos han mga biktima han madugo nga drug war han panahaon ni anay Pangulogn Rodrigo Duterte.
Ha usa nga pakipaghimangraw ha ICC, gintagan hin duon ni Atty. Neri Colmenares nga naabat han pamilya an kalipay nga ha katapusan, in makikit-an na nira an anay pangulo nga ginbabasahan han kaso ha ICC — butang nga maiha na nga ginhuhulat ngan ginkakaruyag han mga ine.
Kinahanglan la nga ma-kumpirma an ngatanan nga mga alegasyon ngan kaso nga ginaakusar kontra kan FPRRD agud nga igpagawas han kada pamilya an ira mga inaabat, labi na an mga tutugutan nga tumestigo ha pagdungog.
Sumala pa ha human rights lawyer, nakontra an mga pamilya ha posible nga pagbalik pa ni FPRRD ha Pilipinas kun waray ginkumpirma an iya kaso, mahitungod nga sigurado nga duro la nga mag aantos an mga ine.
Sumala pa kan Colmenares, makusog an ebidensya nga ginpresenta han Officer of the Prosecutor samtang waray pa nagbuhat hin defense nga magpagawas hin ensakto nga depensa ha ira claims.
