Ginhangyo han mga pamilya han namatay ha war on drugs ni anay Presidente Rodrigo Duterte ha Supreme Court (SC) nga igdeklara nga pagtalapas ha Konstitusyon an mga polisiya nga nagin basaranan han anay administrasyon.
Pinaagi han ira mga abogado tikang ha CenterLaw Philippines, nagaslawad an mga petisyunaer hin usa nga Manifestation and Urgent Motion for Resolution kun diin ginhahangyo nira ha Korte Suprema nga aksyunan na an mga kaso nga nakabinbin tikang pa dida han 2017.
Sakop han petiyon an 26 nga komunidad ha Manila nga daw nakaeksperyensya hin panha-harass dida han kakusgan han war on drugs. Mahitungod ha seguridad, waray na ngarani an mga nasabi nga lugar.
Ginhahangyo gihapon nira ha Korte Suprema nga igdeklara nga pagtalapas ha Konstitusyon an Philippine National Police Command Memorandum Circular 16-2016 o mas kilala kumo “Project Double Barrel,” nga nagin basaranan han anti-drug operations.
Nagpapabilin nga ginpapatuman an nasabi nga polisiya sanglit pwede la gihapon ini magamit han kapulisan kumo basaranan han mga operasyon ha mga kablas nga kumunidad.
Labot hini, naghangyo gihapon an mga pamilya hin Writ of Amparo. Dugang pa han mga ini, nakakaabat la gihapon hira hin mga panarhog, hulga, ngan sayop nga impormasyon an pira nga han mga biktima han war on drugs.
Dida han Marso 2025, gin aresto hi anay Presidente Rodrigo Duterte ha bisa han warrant tikang ha International Criminal Court kasumpay han kaso nga crimes against humanity ngan gindara ha The Hague, Netherlands agud atubangon an ira kaso.
