TACLOBAN CITY – Patay an usa nga parupangisda mahuman nga malumos ha Arteche Eastern, Samar.
Ginkilala an biktima an Naro Jundarino, ada ha legal nga pangidaron, usa nga paru-pangisda, ngan residente han Brgy. Carapdapan Arteche Eastern, Samar.
Sumala kan PLt. Baby Eli Tabale, Officer in Charge Chief of Police han Arteche Municipal Police Station, nahikit-an nala daw an biktima ha usa nga puro han Sitio Madahal hin usa nga Brgy. Tanod nga nagreport ha ira opisina.
Basar han inisyal nga imbestigasyon han kapulisan, lumakat ha ira panimalay an biktima nga mayda na daw gin aabat nga masuol para mamiling hin mud crab o gintatawag nga kinis para igbaligya ha kaluyo nga barangay kun diin ginlalangoy la daw hine an pagtikadto hine.
Waray naman daw nakikita nga foul play han nasabi nga insidente sugadman gin dara la gihapon ine ha Arteche Medical Hospital para igpailarom han examinasyon kun diin gumawas nga cardio-respiratory arrest an ginkamatay hine.
