NATIONAL – Ginsagdunan han Department of Tourism an mga turista lokal man o langyawanon nga siguraduhon nga kita-on hin maupay kun accredited han ira opisina an mga hotel ngan resort nga ira bibisitahon.
Sumala kan Tourism Sec. Christina Frasco, nga ginlalauman nira mahitaas an ihap han mga magbabakasyon ha magkadurudilain nga tourist destination yana nga Holy Week ngan ini in sasamantalahon han mga fly-by-night nga mga resort.
Ginpapaghirot gihapon han sekretarya an publiko kasumpay ha mga peke nga online booking ngan kinahanglan gihapon kitaon hin maupay an ka-transaksyon agud dire mabiktima.
Natapud naman hi Frasco nga mahitaas an ihap han mga turista nga mapakadto ha magkadurudilain nga resorts ngan sikat nga beaches yana nga panahon han kat-sirak.
