TACLOBAN CITY – Magbubutang hin data center an Department of Science and Technology Region 8 para ha sektor han agrikultura agud makag-hatag hin bulig ha mga parag-uma ha Sinirangan Bisayas.
Basar ha nasabi nga ahensya, nga nagbubuhat na hira hin pitad agud buligan an mga parag-uma, partikular na ha mga naperwisyo ngan naka-eksperyensiya han sunod-sunod nga mga kalamidad ha pira nga parte han Sinirangan Bisayas kun diin, dako an nadestruso dinhi an sektor han agrikultura.
Basar naman ha pinaka-latest nga datos han Department of Social Welfare and Development, dida han Marso 28, 2025 in maabot ha 179, 318 nga mga indibidwal an naapektaran han nakalabay nga Shearline tikang ha rehiyon 6,7 ngan 8 kun diin dako gihapon an prosyento an naapektaran ha agrikultura partikular na ha pira nga parte han Samar.
Manunumduman nga ginpahayag ni Presidente Ferdinand Marcos Jr., nga bubuligan an pira nga parte han Sinirangan Bisayas nga pakusgon an internet connectivity gamit an fiber optic, towers ngan satellite technology agud mabuligan an publiko nga maka access hin mas madagmit nga impormasyon labi na an mga aada ha remote nga mga lugar kaupod na an pagpakusog han pagmonitor ha agrikultura nga gintututukang gihapon han DOST Region 8.
Kasumpay hini, in may ginbutang na nga pira nga units an Starlink ha pira nga barangay ha Southern Leyte kun diin nakaka-access hin libre nga internet data an publiko.
Sumala naman kan DOST-8 Assistant Regional Director for Technical Operations Marilyn Radam, usa daw ini ha karuyag nira tutukan agud mas makakuha pa hin datos agud matudlok an mga lugar nga may problema pan-agrikultura sugad man an edukasyon ngan mga estudyante.
Samtang, nanawagan naman an pira nga parag-uma ha gobyerno nga dire la unta internet connectivity an tutukan, pati gihapon an trabaho, presyo han mga pangunahon nga papliton ngan sugadman an pagpapakusog ha baligyaan ngan pampresyuhan han ira mga produkto.
(Via Bombo Jake Paguipo)
