INTERNATIONAL – Nagkalasan ngan nagkalisang an mga nakakita ha paglaprak han eroplano ha paluparan han Aktau, Kazakhstan.
Usa nga Azerbaijan Airlines plane nga nag-o-operate hin flight J2-8243 tikang Baku pakadto Grozny an lumaprak via emergency landing.
Mayda 67 nga sakay, kaupod an 62 nga pasaheros ngan lima nga crew members.
Sumala ha inisyal nga report, an paglaprak in matungod han bird strike o kun pagbangga ha mga tamsi.
An mga pasaheros naman in tikang ha magkadurudilain nga nasud; 37 tikang ha Azerbaijan, 16 tikang ha Russia, 6 tikang ha Kazakhstan, ngan 3 tikang ha Kyrgyztan.
Nagpahayag naman hin pakikisubo an airline company ha mga pamilya han mga biktima ngan ginsigurado nga mahatag hira hin tanan nga kinahanglan nga suporta.
Padayon naman an imbestigasyon ha tinuod nga rason han paglaprak.
