TACLOBAN CITY- Nagpalusad an Department of Employment DOLE regional office 8 hin Labor Advisory No. 04 series of 2022.
An mao nga advisory in may paghisumpay ha magigin sweldo han mga empleyado nga maabsent matungod nga uupdan han mga ine an ira mga anak nga magpabakuna kontra COVID-19, kun diin nagtikang han nakalabay nga Pebrero 10-11,2022.
Sumala kan Marae Costimiano, Information Officer DOLE regional office 8, nga gin-aallowed han ira buhatan nga pwede nga dire sumulod an usa nga empleyado ha ira trabaho matungod nga uupdan han mga ine an ira mga anak.
Dugang pa han mao nga opisyal nga naghahangyo an mao nga buhatan nga igkonsidera han mga employer an ira mga empleyado nga waray makasulod matungod nga gin-updan hine nga magpabakuna an iya anak.
Ginkikinahanglan gihapon nga magpakita hin katibayan an usa nga empelyado nga ine in tinuod nga umopod ha iya anak agud nga bakunahan kontra COVID-19.
Ginmalatumat pa han mao nga opisyal nga depende nala ha employer kun iibanan han mga ine an sweldo han iya empleyado.
Naghatag naman hin suhestyon an mao nga opisyal nga pananglitan may mag absent nga usa nga mantratrabaho ha iya trabaho matungod ha mao nga rason in pwede nga igbutang han iya employer an iya absent day, ha naka-talaan nga leave day hine agud nga dire an mga ine maabsenan ha ira trabaho.
