NATIONAL – Kumpiyansa hi Department of Labor and Employment (DOLE) Secretary Bienvenido Laguesma nga an tikahirani nga 2025 National and Local Elections in makakaghimo hin mas damo nga job opportunities para ha mga Pinoy.
Ha luyo hini, ginklaro naman ni Laguesma nga dire nira igaasa la ha nagtitikahirani nga eleksyon an presente nga unemployment rate han nasud.
Dugang hini nga nakatutok hira ha Labor and Employment Plan 2023-2028, kun diin an gobyerno in tinuig nga nagbubuhat hin monitoring ha mga emerging occupations ngan nagbibiling han mga pamaagi agud mabuligan an labor market nga makag-adjust ha global changes and development.
Ginpaangbit gihapon ni Laguesma nga an mga foreign trips ni Pres. Ferdinand Marcos Jr. in nakag-generate hin 201 investments nga nagresulta ha mga proyekto nga may kalabutan ha power ngan renewable energy sectors, electronics ngan manufacturing, nga nagkakantidad hin P4 trilyon.
Manunumduman nga an unemployment rate han nasud in aada ha 3.1% dida han Disyembre 2024, samtang an overall unemployment rate para ha tuig in aada ha 3.8% nga pinakahamubo nga nahipatik tikang han 2005.
