Ginpagawas na han Department of Justice (DOJ) an Immigration Lookout Bulletin Order (ILBO) kontra ha anay Ateneo de Manila University head coach nga hi Tab Baldwin ngan upat nga iba pa nga indibidwal kasumpay ha imbestigasyon ha pagkamatay han student-athletes nga hira Rene Clert Baterbonia ngan Divine Adili.
Sumala kan DOJ Acting Secretary Fredderick Vida, ginpagawas an ILBO dida han Hunyo 17, 2026 kontra kanda Baldwin, anay team manager Christopher Quimpo, assistant coach Reynaldo Jacinto Jr., assistant coach Dean Castaño, ngan assistant coach Sandro Soriano.
Panuyo han ILBO nga mabantayan ngan mamonitor an mga biyahe o pagkiwa han mga inbidwal nga dabi ha usa nga kaso o imbestigasyon. Sugadman, dire hini otomatiko nga iginbabawal an ira paglakat han nasud.
Subay ha buhatan, pwede la mapugngan an usa nga indibidwal nga makabiyahe pagawas han Pilipinas kun mayda ginpagawas nga Precautionary Hold Departure Order (PHDO) samtang aada ha preliminary investigation an kaso, o Hold Departure Order (HDO) kun maipasa na ini ha korte.
Ha presente, nagpapadayon an imbestigasyon kasumpay ha pagkamatay nira Baterbonia ngan Adili agud matudlok kun mayda pagbaton nga kriminal an mga dabi ha insidente.
