-- Advertisements --
NATIONAL – Waray pa nahipapatik an Department of Health nga bag-o nga kaso hin monkeypox virus ha nasud.
Ine in kahuman ha pagdeklara han World Health Organization kumo global public health emergency han nasabi nga virus mahitungod ha pagdamo han kaso hine ha Africa.
Ginpahayag ni DOH Spokesperson Albert Domingo nga waray na madugngan an siyam nga ihap han nasabi nga kaso.
An urhi nga kaso in nahipatik ha nasud dida pa han nakalabay nga Disyembre 2023.
Dugang pa hine, naka-alerto an ira Bureau of Quarantine labi na ha mga turista nga tikang ha Africa.
Manunumduman nga nakaghipatik an Africa hin sobra 15,000 nga kaso han Monkeypox kun diin sobra 500 katawo na an namatay.
