-- Advertisements --
NATIONAL – Nahipatik han Department of Health (DOH) an gutiay nga paghitaas han ihap han mga kaso han dengue ha nasud para ha bulan han Hunyo.
Subay ha DOH nga umabot ha 10,733 an nahipatik nga kaso han dengue tikang han Hunyo 15 kutob Hunyo 28.
Mas hitaas ine kumpara ha 8,233 kaso nga nahipatik ha syahan nga duha kasemana han parehas nga bulan.
Nag-aandam na gihapon an ahensya ha posible nga padayon nga paghitaas han kaso han dengue mahitungod ha padayon nga pag-inuran ngan pagbaha dida han nakalabay nga semana labi na ha parte han Luzon.
Kadungan hine, nanawagan an ahensya ha publiko nga sundon an ira “4Ts” campaign — Taob, Taktak, Tuyo, Takip — agud malikayan an pamunay han mga lamok ha sulod ngan palibot han balay.
