Naghatag hin pahinumdom an Department of Health (DOH) ha publiko nga magbuhat hin mga alternative cooling techniques agud nga maibanan an epekto han mapaso nga panahon.
Ha usa nga press conference, ginsagdon ni Health Secretary Ted Herbosa nga an mga katawhan nga exposed ha hitaas nga heat index in pwede nga gumamit hin hulos nga towel o bimpo panhinis ha ira lawas.
Pwede gihapon daw nga gumamit hin spray bottle nga mayda sulod nga tubig ngan ini in pwede nga himuon nga regular spray o moisturizer han lawas.
Agud nga maging hydrated, ginrekomenda ni Herbosa nga imbes nga pumalit hin sports drinks, pwede nga maghimo hin kalugaringon drinks.
Kumuha la hin usa kabaso hin tubig, butangi hin gutiay nga asin ngan asya an pwede inumon agud nga magpabilin nga hydrated.
Ha pagkayana sumala kan Sec. Herbosa, 34 na nga kaso hin heat-related illnesses an naitala ha bug-os nga nasud yana nga tuig.
Ha mao nga ihap, unom an naitala nga namatay pero padayon nga ginbeberipika han DOH an rason han kamatayon han mga ini.
