TACLOBAN CITY – Gintagan hin pagkilala han Department of Health (DOH) Regional Office 8 an pira nga mga local government units ngan goverment agencies mahitungod han strikto nga pag-implementar han mga ini han no-smoking policy.
Ha 2018 Red Orchid Award, 22 nga mga buhatan han gobyerno, tulo nga ospital ngan pito nga mga LGUs an gintagan hin pagkilala han DOH para han ira mahugot nga implementasyon han smoke-free environment.
Sumala kan DOH 8 Regional Director Minerva Molon ini in magseserbi kumo inspirasyon ngan pahinumdom ha ngatanan nga ipadayon an paniguro ha pagpaupay han kinabuhi han mga miyembro han komunidad.
Kaupod ha mga awardees an PhilHealth field offices ha syudad han Tacloban, Ormoc, Maasin, Borongan, Calbayog ngan Catbalogan ngan ha mga bungto han Naval, Biliran, an regional office han Bureau of Jail Management and Penology, mga presuhan ha Naval, Catarman, Northern Samar, Burauen, Leyte, San Juan, Southern Leyte, Carigara, Leyte, Baybay City, Borongan, Ormoc ngan an mga municipal jails han Palo ngan Palompon.
Para ha mga government hospitals, kaupod ha Red Orchid Awardees an Allen District Hospital, Northern Samar Provincial Hospital, ngan Tacloban City Hospital.
Para naman ha local government category, pira ha mga awardess an bungto han Silago, Limasawa, San Francisco ngan Padre Burgos ha Southern Leyte, San Antonio ha Northern Samar, Arteche ha Eastern Samar ngan Ormoc City.
An regional offices naman han PhilHealth ngan Civil Service Commission an nakakuha han Hall of Fame award para han government offices.
Nahibaruan nga an DOH Red Orchid Award, in usa nga kinada tuig nga aktibidad kon diin gintatagan hin pagkilala an mga lugar o ahensya nga naghihimo hin mga polisiya ngan pag-implementar han smoke free environment.
