METRO MANILA – Gin kikwestyon yana ha social media an pagkakatudlok kan Department of Health (DOH) Undersecretary Zhielah Ritz Gatchalian kumo usa ha mga opisyal nga makapot ha Medical Assistance for Indigent Patients (MAIP) program han ahensya mahuman nga magsarang an usa nga post nga nagsusulod hin alegasyon kasumpay ha daw dire pa nababayaran nga utang.
Ha usa nga post, usa nga indibidwal nga nagpakilala nga “Marko Polo” an nagyakan han ngaran ni Gatchalian ngan nagbuyagyag han mga detalye han utang nga nagkakantidad hin P6,630 ha usa nga pribado nga kumpanya.
Kaupod gihapon ha post an pira nga personal nga impormasyon nga iginsusumpay ha opisyal.
Waray pa naman opisyal nga kumpirmasyon tikang ha DOG o tikang kan Gatchalian kasumpay ha alegasyon.
Subay ha pira nga magkirita ha sektor han panlawas, importante nga klaro an integridad ngan reputasyon han mga opisyal nga igtutudlok ha mga prograsma nga nakapot han pampubliko nga pondo, labi na ha mga programa nga direkta nabulig ha mga pasyente.
An MAIP in programa nga naghahatag hin bulig-pinansyal ha mga indigent patients agud makabulg ha ira gastuson nga medikal.
Ha ilarom han Republic Act No. 6713 o Code of Conduct and Ethical Standards for Public Officials and Employees, ginlalauman ha mga empleyado han gobyerno an kinabuhi nga simple, tangkos, ngan mayda hitaas nga lebel han propesyunalismo ha serbisyo-publiko.
Ginmalatumat han pira nga health advocates nga importante an dayun nga pagkaklaro ha isyu agud malikayan an pagdududa han publiko.
Nanawagan gihapon hira ha buhatan han DOH nga magdumara hin kaangayan nga imbestigasyon kun kinahanglan ngan siguraduhon nga an mga opisyal nga iginbubutang ha sensitibo nga posisyon in naagi ha mahugot nga background checking.
