TACLOBAN CITY – Gini-imbitaran han Department of Health (DOH) Region 8 an publiko nga maki-usa ha selebrasyon han “Biyaheng Kalusugan” nga naka-pokus ha Family Planning, nga pagbubuhaton yana nga Biyernes, Agosto 15, ha Tacloban City Astrodome.
May-ada hini tema nga “Tara, Usap tayo sa Family Planning: Tandaan, Panalo ang Pamilyang Planado” nga may panuyuan nga aghaton an publiko ha usa nga pagharampang kasumpay ha family planning ngan reproductive health.
Ginklaro gihapon han DOH nga an panuyuan han programa in dire la an maupay nga pagkontrol han population, kundi an paghahatag hin insakto nga edukasyon ngan informed choices para ha kalawasan han pamilya.
Mag-aabri an programa pinaagi han usa nga motorcade ha siyudad han Tacloban, kasunod an mga aktibidades sugad han interactive booths, gallery walk, ngan myth busters agud nga tagan pagklaro an dire sakto nga panuohan kasumpay han family planning, ngan pagdi-distribwer gihapon hin IEC materials.
Magkakaada gihapon hin libre nga screening para ha cervical ngan breast cancer, HIV testing, ngan on-the-spot counseling.
Abri naman iton programa para ha ngatanan nga nage-edad 15 kutob 49 years old, pero gin-aaghat nga magpartisipar an hino man nga interesado.
