TACLOBAN CITY – Waray daw may nahipatik nga dagko nga mga panhitabo han Department of Health (DOH) Regional Office 8 subay ha ira monitoring han bug-os nga Semana Santa.
Sumala kan John Paul Roca, tagapagyakan han DOH 8, tanan han mga ira mga buhatan in nakacode white alert tikang pa han pagtikang han Semana Santa para ha ira monitoring ha anuman nga insidente nga nanginginahanglan hin dayon nga serbisyo medikal ngan first aid.
Subay naman ha ira monitoring ha bug-os nga semana waray dagko nga insidente labot la han pito nga minor injuries nga nahipatik.
Kaupod na hini an usa nga vehicular accident, kaso hin hypertension, fainting, nosebleed, ngan jellyfish sting kun diin duha nga bata an nabiktima hini,ine naman in dayon nga natagan hin kaangayan nga bulig ngan ha pagkayana in ada na ha talwas nga kabutangan an mga biktima.
Ha pagkayana in padayon naman nga nakaalerto an DOH ha pagmonitor han mga sakit nga pwede nga makuha han publiko yana panahon han katmara o summer season.
