Nagkasabot an Department of Finance o DOF ngan World Bank nga magbinuligay agud mapalaksi an proseso han pagpopondo ha mga proyekto nga pag-ursa han Pilipinas.
Ha pahayag han DOF, ginhingadayan ni Finance Secretary Frederick Go ngan World Bank Managing Director for Operations Anna Bjerde an mga proyekto nga ginpopondohan han bangko ha nasud. Kaupod dinhi an mga panukala nga pautang para ha mga programa nga pag-ursa ngan podno nga posible gamiton kun may-ada kalamidad.
Umatender gihapon ha pagharampang hi Budget Secretary Kim Robert de Leon, DEPDev Undersecretary Joseph Capuno, ngan iba pa nga opisyal. Gindumara an mga pagharampang ha Bangkok, Thailand, kadungan han 2026 Annual Meetings han International Monetary Fund ngan World Bank.
Subay ha World Bank, may-ada ini 21 nga aktibo nga operasyon ha Pilipinas nga nagkakantidad hin 8.73 bilyones dolyares, o sobra-kulang P550.4 bilyon, ha 12 nga sektor kutob ha katapusan han Agosto. May-ada gihapon ini 113 aktibo nga grant nga nagkakantidad hin 98 milyones dolyares para ha teknikal nga bulig ngan pagpapatuman han mga proyekto.
Usa an World Bank ha mga pangunahon nga kasugbong han Pilipinas ha opisyal nga bulig ha pagpaursa. Subay ha panginano han DEPDev, ginsuportahan han bangko an 31 nga proyekto nga nagkakantidad hin 8.5 bilyones dolyares hadton 2025.
